Gentilshommes verriers de l'Ouest de la France

Le vingt et cinquiesme jour de apvril mil six cent

soixante et un Thomas de Brossard escuier sieur des Rivieres

fils de defunct Joachim de Brossard vivant escuier sieur des

Rivieres et de demoiselle Rachel de Grenier demeurans en la

paroisse de La Ferriere viconte de Domfront en Passais diocese

du Mans et de presens demeurant a la haulte verrerie de

Bouillé paroisse de S(ain)t Denis d'Orques s'est presenté à nous

declaré, juré et asseuré par serment avoir esté baptizé

au lieu de Baudet appelé le temple des Ventes en ladicte

paroisse de La Ferriere ainsi quil a appris et faict certain par

ses pere et mere et proches parens, confessé que par la

persuasion de sad(ite) mere il a suivi la mauvaise doctrine

et heresie de Calvin jusques a presens que ayant esté ecleré

de la lumiere du s(ain)t esprit et recogneu l'erreur de ladicte heresie

et informé de la verité de la religion catholique apostolique

et romaine nous a requis estre receu a l'abjuration de lad(ite)

heresie et l'a abjuree et faict profession de la foy catholique

apostolique et romaine et juré de vivre et mourir en icelle

moyenant la grace de dieu : et le tout faict apres iceluy avoir esté

instruict et catechisé par nous curé de S(ain)te Suzanne et

venerable et discret maistre Francois du Rabareul pbre(tre)

predicateur et mesme receu les ceremonies du baptesme

ce que nous avons faict par l'ordre et pouvoir a nous

donné de la part de monseigneur le reverendissime et

illustrissime evesque du Mans L'acte cy dessus faict et

atesté Le mesme jour que dessus en nostre maison presbiterale eglise parochiale aud(it)

lieu de S(ain)te Suzanne pr(ésen)s m(aîtr)e François Girard pbre(tre), m(aîtr)e Julien

Guesdon ad(vo)cat au siege royal de S(ain)te Suzanne et autres

soubsignés huict mots effacés ne valent gloze que dessus eglise parochiale